“ਗਿਆਨ ਅੰਮ੍ਰਿਤ” ਸੰਗੀਤਕ ਪੇਸ਼ਕਾਰੀ ਦੌਰਾਨ ਇਟਾਵਾ ਘਰਾਣੇ ਦੇ ਵਿਦੁਸ਼ੀ ਸ਼੍ਰੀਮਤੀ ਸ਼ਰਾਬਨੀ ਬਿਸਵਾਸ ਵਿਦਿਆਰਥੀਆਂ ਨੂੰ ਸਿਖਾਏ ਸੰਗੀਤਕ ਗੁਰ
ਅੰਮ੍ਰਿਤਸਰ,19 ਨਵੰਬਰ 2026 (ਅਭਿਨੰਦਨ ਸਿੰਘ)
ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੇ ਵਿਜ਼ੂਅਲ ਅਤੇ ਪਰਫਾਰਮਿੰਗ ਆਰਟਸ ਵਿਭਾਗ ਵਿਖੇ ਉਪਕੁਲਪਤੀ ਪ੍ਰੋ. ਡਾ. ਕਰਮਜੀਤ ਸਿੰਘ ਜੀ ਦੇ ਦਿਸ਼ਾ ਨਿਰਦੇਸ਼ ਹੇਠ “ਗਿਆਨ ਅੰਮ੍ਰਿਤ” ਲੜੀ ਦੇ ਤਹਿਤ ਇੱਕ ਸੰਗੀਤਕ ਪੇਸ਼ਕਾਰੀ ਦਾ ਆਯੋਜਨ ਕੀਤਾ ਗਿਆ।
ਸ੍ਰੀ ਅੰਮ੍ਰਿਤਸਰ ਸਾਹਿਬ ਦੇ 450 ਸਾਲਾ ਦਿਵਸ ਨੂੰ ਸਮਰਪਿਤ ਇਸ ਲੜੀ ਦੀ ਪ੍ਰਧਾਨਗੀ ਵਿਭਾਗ ਦੇ ਮੁਖੀ ਡਾ. ਰਾਜੇਸ਼ ਸ਼ਰਮਾ ਨੇ ਕੀਤੀ। ਸੰਗੀਤ ਦੇ ਸੁਪ੍ਰਸਿੱਧ ਕਲਾਕਾਰ ਪਦਮਸ਼੍ਰੀ ਉਸਤਾਦ ਸ਼ਾਹਿਦ ਪਰਵੇਜ ਜੀ ਦੀ ਸ਼ਾਗਿਰਦ ਹਨ ਅਤੇ ਆਲ ਇੰਡੀਆ ਦੂਰਦਰਸ਼ਨ ਦੇ ਟਾਪ ਗਰੇਡ ਸਿਤਾਰ ਵਾਦਿਕਾ, ਇਟਾਵਾ ਘਰਾਣੇ ਦੇ ਵਿਦੁਸ਼ੀ ਸ਼੍ਰੀਮਤੀ ਸ਼ਰਾਬਨੀ ਬਿਸਵਾਸ ਨੇ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ ਅਤੇ ਸੰਗੀਤਕ ਪੇਸ਼ਕਾਰੀ ਦੇ ਅੰਤਰਗਤ ਰਾਗ ਗੂਜਰੀ ਤੋੜੀ ਦਾ ਵਾਦਨ ਕੀਤਾ ਅਤੇ ਉਸਦੇ ਨਾਲ-ਨਾਲ ਤੋੜੀ ਦੇ ਵਿਸ਼ੇਸ਼ ਅੰਗਾਂ ਦੇ ਚਲਨ ਅਤੇ ਤਿਆਰੀ ਬਾਰੇ ਦੱਸਦੇ ਹੋਏ ਗੂਜਰੀ ਤੋੜੀ ਵਿੱਚ ਆਲਾਪ ਤਾਨ ਦੀ ਬੜਤ ਅਤੇ ਤਿੰਨਾਂ ਸਪਤਕਾਂ ਉੱਪਰ ਹੱਥ ਦੀ ਤਿਆਰੀ ਬਾਰੇ ਵਿਦਿਆਰਥੀਆਂ ਨੂੰ ਜਾਣਕਾਰੀ ਦਿੱਤੀ ਗਈ।
ਅੰਤ ਵਿੱਚ ਉਹਨਾਂ ਨੇ ਲੋਕ ਧੁੰਨ ਭਟਿਆਲੀ ਦਾਵਾਦਨ ਕਰਕੇ ਆਪਣੀ ਸੰਗੀਤਕ ਪੇਸ਼ਕਾਰੀ ਨਾਲ ਵਿਦਿਆਰਥੀਆਂ ਨੂੰ ਮੰਤਰ ਮੁਗਧ ਕੀਤਾ। ਇਸ ਪੇਸ਼ਕਾਰੀ ਦੌਰਾਨ ਤਬਲੇ ’ਤੇ ਸੰਗਤ ਸ਼੍ਰੀ ਸਿਧਾਰਥ ਚੈਟਰਜੀ ਦੁਆਰਾ ਕੀਤੀ ਗਈ।
ਇਸ ਪ੍ਰੋਗਰਾਮ ਦਾ ਮੰਚ ਸੰਚਾਲਨ ਵਿਭਾਗ ਦੀ ਵਿਦਿਆਰਥਣਾਂ ਜਤਿੰਦਰ ਕੌਰ ਅਤੇ ਦੀਪਾਲੀ ਵਰਮਾਵੱਲੋਂ ਕੀਤਾ ਗਿਆ। ਪ੍ਰੋਗਰਾਮ ਦੇ ਅੰਤ ਵਿੱਚ ਡਾ. ਰਾਜੇਸ਼ ਸ਼ਰਮਾ ਨੇ ਸਭ ਦਾ ਦਿਲੋਂ ਧੰਨਵਾਦ ਕੀਤਾ।

